Friday, November 23, 2012

الديكتاتور القادم



رحبوا معانا وهيصوا وزغردوا للديكتاتور القادم محمد المرسي.. او نقول انه فاترينة ديكتاتور اعتباري هو مكتب الارشاد

اتبع الرئيس نظرية السم في العسل في الاعلان الدستوري المنيل اللي اصدره.. بدا بحاجة كل الناس تتمناها وهي اقالة النائب العام الفاسد عبدالمجيد محمود وتعيين نائب عام جديد لمدة 4 سنين بس..

قبل ما تفرح وتقول هييييييييه اصبر كدا واسمع باقي المصايب عشان نشوف احنا رايحين على فين؟

الرئيس قرر يعيد المحاكمات في قضايا قتل والشروع في قتل الثوار والجرائم اللي ارتكبت ضد الثوار بواسطة كل من تولى منصب سياسي او تنفيذي في عهد "النظام السابق". ونسي الريس مذابح مسرح البالون وماسبيرو ومحمد محمود ومجلس الوزراء وبورسعيد.. فين المجلس العسكري اللي فضل يقتل في الشباب سنة ونص .. ولا عشان فيه اتفاقية تعاون مشترك بين الاخوان والمجلس العسكري قررتوا انكم تصهينوا عنهم؟؟

نيجي بقى لطريقة عمل الديكتاتور:

 الاعلانات الدستورية والقوانين الصادرة من الريس ، من اول ما ربنا ابتلانا بيه وحتى كتابة الدستور اللي هيخربها اكتر علينا وانتخاب مجلس شعب اغلبه اخوان ان شاء الله ، تكون نهائية ونافذه بذاتها غير قابلة للطعن عليها باي طريقة وأمام اي جهة .. ولا يجوز التعرض لقراراته بوقف التنفيذ او الإلغاء وتنقضي جميع الدعاوى المتعلقة بها والمنظورة امام القضاء.

اول خطوة دايما في صناعة الديكتاتور انه ميكونش فيه حد يحاسبه او سلطة تقدر تناقش قراراته او تلغيها لو كانت غلط.. ده دلوقتي اللي عمله الديكتاتور الجديد محمد المرسي بقراره ده .. المفروض لو هو تقي وبتاع ربنا ومش عايز يكون ديكتاتور كان خلى السلطة القضائية على كل عيوبها هي البديل لمجلس الشعب عشان ميبقاش فيه حد منفرد بالسلطة لان الانفراد بالسلطة هو اللي جر علينا كل المصايب اللي قبل كدا.

تاني خطوة هي تحصين الجمعية التأسيسية لسلق الدستور ومجلس الشورى من احكام القضاء..
الجمعية التأسيسية اللي كان اغلبها اخوانية وسلفية ودلوقتي تقريبا بقت كلها اخوانية وسلفية بعد انسحاب جهات واعضاء كتير جدا ومفضلش غيرهم.. ومجلس الشورى هما بردو اصحاب الاغلبية فيه .. يعملوا اي مصايب هما عايزينها ومحدش يقدر يعترض ولا يتكلم.. ولا حد يقدر يحاسبهم غير الرئيس طبعا عشان محدش يوزه عقله في مرة ويفكر يعمل حاجة تضر الرئيس زي انه مثلا يقرر في الدستور ان الرئيس اخره مدتين بس او انه يحدد صلاحياته.

اخر حاجة في الكارثة الدستورية دي وتالت خطوة في صناعة الديكتاتور هي انه الرئيس طويل العمر من حقه اذا كان فيه خطر يهدد ثورة 25 يناير اللي هما دمروها خلاص او حياة الأمة اللي انتهت او الوحدة الوطنية اللي مش موجودة أصلا أو سلامة الوطن اللي في الانعاش .. اي حد الشيطان يوسوسله ويفكر انه يضر الحاجات اللي قلناها دي الرئيس هيتخذ معاه كافة الإجرارات اللازمة لمواجهته وفقا للقانون " اللي احنا اصلا مش عارفين ايه هو..وربنا يخلي الترزيه"

المادة دي بتفكرني بقانون الطوارئ بتاع حسني مبارك.. نفس الصياغة العايمة اللي بتحمل مليون تفسير وممكن اللعب فيها باسهل وسيلة.. يعني ممكن مثلا بعد شوية نكتشف ان المظاهرات السلمية خطر في قاموس الرئيس ولازم التصدي ليها بحزم.. او ان فيه شخصية وطنية مرموقة بدأت تظهر وتلم الناس حواليها والرئيس اعتبر ده خطر على الدولة "على اعتبار ان الرئيس هو الدولة" فقرر انه يتخلص منه بأي طريقة من الطرق.. او جرنال محترم او برنامج محترم الرئيس اعتبره خطر يهدد الوحدة الوطنية فقرر يقفله. أو زي ما عمل الحرس الثوري الإيراني لما قتل المتظاهرين بحجة انهم بيقتلوهم " ليكفوا عن الآثام لأنهم أعداء الله ما داموا يعارضون الخوميني"، وطبعا كلنا فاكرين المصايب اللي اتعملت في الناس بحجة حماية ثورة يوليو وحماية البلد.

واهم مكون من مكونات صناعة الديكتاتور هو قبيلة الزمارين والطبالين اللي ايدوا قرارات الرئيس من قبل ما ينزلها أصلا وبيتغنوا بيه وبحكمته وقوة شكيمته وبصيرته النافذة وكل الصفات دي اللي بالصدفة كان قبائل زمارين حسني مبارك بيقولوهاله بردو..

اخر حاجة ودي مش هتأثر أوي هي انه عدل اقصى مدة لكتابة الدستور من 6 شهور خلاها 8 شهور من بداية الاعلان الدستوري المكمل من تاريخ تشكيلها .. يعني بدل ما كانت فترة سلق الدستور 6 شهور بقت 8 شهور بس .. وفي الحالتين مش هيلحق يستوي كويس (وهو اصلا في الحالتين بيتسلق).

باختصار مرسي استولى على السلطة التشريعية والتنفيذية ولغى القضائية..

نصيحة للرئيس.. ارجع بسرعة اقرى تاريخ حسني مبارك واعرف الثورة اتعملت ضده ليه واعقل قبل ما تحصله.

ارحم البلد يرحمك الله..

أحمد عويضه

Tuesday, November 20, 2012

بأي ذنب قتلت ؟



6:00 ص...
تصحى الأم من النوم.. تتوضى وتصلي الصبح وتدعي ربنا انه يسترها معاها هي وجوزها وابنها الوحيد ويجعله من الصالحين. تشغل اذاعة القرآن الكريم عشان تسمع القرآن بصوت الشيخ عبدالباسط وتبدأ في تجهيز الفطار..

6:30 ص...
تدخل الأم عشان تصحي ابنها..
الأم : عبدالله .. قوم يلا يا حبيبي.
عبدالله : سبنيي انام شوية يا ماما الدنيا برد.
الأم : قوم يلا يا حبيبي بطل دلع .. كدا هتتأخر على معاد الاوتوبيس.
يتعدل عبدالله وهو بيحاول يفتح عنيه وتخرج الام من الاوضة وينام تاني ..
ترجع الأم للأوضه عشان هي عارفه حركات ابنها...
الأم : يلا يا عبدالله يا حبيبي قوم عشان المدرسة عشان مزعلش منك.
عبدالله : خلاص يا ماما حاضر .. هاقوم اهو.

7:00 ص...
يقوم عبدالله اخيرا من السرير.. يدخل الحمام يتوضى  ويصلي الصبح ببعض آيات من العشرين جزء اللي حافظهم من القرآن الكريم.. تتفرج الام على ابنها وهو بيصلي بخشوع ويرتل الآيات بصوته الجميل وقلبها بيرقص وعينيها تدمع فرحة بابنها اللي بتحلم انه يكون مثال ناجح للإنسان المسلم في المجال اللي هو يحب يكمل فيه.
ينتهي عبدالله من الصلاة ويقعد ع الارض جنب امه عشان يفطروا ويشربوا الشاي.. بعد كدا يقوم يلبس هدوم المدرسة عشان خلاص ميعاد الاوتوبيس قرب.

7:30 ص...
ياخد عبدالله شنطته ويبوس ايد امه وهي بتوصيه انه ياكل السندوتشات بتاعته كلها ويركز كويس في المدرسة وفي حفظ القرآن وميشاغبش..
ينزل من البيت ويقف اول الشارع مستني الاوتوبيس عشان ياخده لمدرسته .. والأم واقفة في البلكونه تتابع ابنها وقلبها يواصل الدعاء له بالستر والصحة والعمر الطويل والنجاح.

7:45 ص...
يوصل الأوتوبيس اخيرا ويركب عبدالله .. يسلم على عم سيد السواق اللي واضح انه لسه مصحيش من النوم وعلى زمايله ويقعد جنب محمود زميله في الفصل وصديقه العزيز.
زي عادتهم كل يوم من اول ما يركبوا الاوتوبيس يفضل عبدالله ومحمود يحكوا لبعض كل اللي حصل وعملوه امبارح من اول ما روحوا البيت لحد تاني يوم لما اتقابلوا..

8:00 ص...
يفوق عبدالله ومحمود من الكلام على صوت صراخ زمايله "حاسب يا عم سيد".. يبص عليهم.. نظراتهم مرعوبة ومتجمدة ناحية الشمال .. يبص على شماله يلاقي قطار على بعد عدة امتار مندفع بسرعة جدا ناحية الاوتوبيس... و... ..
صوت تصادم رهيب وحس عبدالله انه بيطير من مكانه وشاف كل زمايله بيطيروا من مكانهم زيه .. يلاقي نفسه فجأة طاير برة الأوتوبيس ويصطدم بالأرض ويشعر بألم رهيب ... وفجأة ميحسش بأي حاجة خالص.

بعد دقيقة يصحى عبدالله وهو حاسس براحة نفسية غير عادية .. حاسس بإنه في خفة الريشة وطاير في الهوا.. الآلام الرهيبة اللي كان حاسس بيها من دقيقة اختفت .. يفتح عينيه ويبص حواليه يلاقي نفسه طاير.. يبص على الارض تحته يلاقي الأوتوبيس اللي كان راكبه متدشدش وكل زمايله مرميين ع الارض غرقانين في دمهم هما وكراريسهم وشنطهم.. فجأة يشوف نفسه.. جثته على الأرض غرقانة في دمها.. يصرخ ويصرخ ويصرخ بس ميسمعش صوت صراخه..

فجأة يلاقي ملك جميل من نور بجناحين نازل جنبه.. يبصله عبدالله وهو يبكي يقوله: ايه اللي حصل؟
يرد الملك: انت خلاص مت.. انت دلوقتي روح صاعدة لبارئها سبحانه وتعالى..
يقول عبدالله: ليه ؟؟ متنا ليه واحنا اطفال صغيرة لسه مفتحناش .. ليه اهالينا ميلحقوش يفرحوا بينا.. ليه أمي تموت بحسرتها على ابنها الوحيد اللي كان نفسها انه يكون احسن واحد في الدنيا.. الناس اللي مات كل ولادهم ذنبهم ايه يتخطفوا منهم قبل ما يفرحوا بيهم؟
يرد الملك: ربنا سبحانه وتعالى هيلهمهم الصبر وان شاء الله يلحقوا ولادهم في الجنة.
عبدالله: واللي قتلونا.. هيتحسابوا ولا لأ؟
الملك: الله سبحانه وتعالى العدل الجبار يمهل ولا يهمل.. لو متحاسبوش في الدنيا حسابهم عسير في الآخرة عند رب العالمين.. يلا بينا يا عبدالله.
عبدالله: هنروح فين ؟
الملك: الجنة.


أحمد عويضه

Tuesday, November 13, 2012

العصر الذهبي



ياااااااااه فين ايام زمان .. كانت ايام جميلة كلها خير وكان كل حاجة ليها طعم حلو..
دي الجملة الاثيرة اللي دايما تسمعها من الناس الكبيرة ويكون قبلها تنهيدة حارة عميقة ومصمصة الشفاه ومفيش مانع يكون بعدها جملة "مش زي ايامكم المنيلة بنيلة دي"

كل تفكيرنا دايما ان الماضي هو العصر الذهبي في كل حاجة وانه دايما افضل من الحاضر وان العصر الذهبي ده خلاص انتهى بالحاضر اللي احنا عايشينه.. كل جيل بيصر ان ايامه كانت حلوة اوي والايام اللي قبلها كمان ودايما الايام اللي بعدها منيلة بنيلة.. اعتقد ان جيل جدودنا كان بردو بيتقالهم زمان انتو ايامكم منيلة بنيلة ومفيهاش اي بركة ولا خير وكل جيل يسمع الجيل اللي قبله الكلام ده لحد ما نلاقي الاب بيرعى الأغنام في البادية وبيقول لابنه "ما هذا الهراء الذي تسمعونه؟؟ أتظن ان ما يقوله هذا المدعو قيس بن الملوح شعراّ؟ واضيعتاه لزمن الشعر الجميل.. وقتما كنا نجلس حول الكعبة لنسمع معلقات عمرو بن كلثوم وامرئ القيس".

المشكلة ان العصر الذهبي بالنسبة للناس مش في الفن بس .. ده في كل مجالات الحياة .. دايما متخيلين ان اللي فات كان جميل وخير وبركه وتقدم وحضارة ودي حاجة كويسة جدا انك تعتز بتاريخك بس المشكلة بقى لما تشوف دايما ان اللي جاي منيل بنيلة.. وده اكبر عائق في تقدم اي امة.

يقول الفيلسوف الراحل زكي نجيب محمود "وفكرة التقدم هذه من الأفكار المركبة التي تحتوي أبعاد كثيرة. فمنها ان الآخذ بها لابد من أن يجعل نفسه على اعتقاد راسخ بان الحاضر قد هضم الماضي، ثم أضاف جديدا تلو جديد مما انتجته السنون. ومعنى هذا ألا يكون (العصر الذهبي) وراء ظهورنا، بل يكون موضعه الصحيح هو في المستقبل الذي يعمل الناس على بلوغه. ومن هنا تكون فكرة (التقدم) محتوية على وجوب (التغير) مع متغيرات الحضارات المتعاقبة، و(التطور) الذي ينقل صور الحياة نحو ما هو أعلى. ومعنى ذلك وجوب الاهتمام (بالمصير) ".

تاريخنا ملئ بالنقاط المضيئة في العالم كله بداية من عمر بن الخطاب رضي الله عنه، العبقرية الادارية الجبارة، مؤسس الدولة الإسلامية ، دولة اساسها الجانب الإيماني والروحاني والجانب الإداري العلمي وكانت النتيجة ان الدولة دي تسيدت العالم مئات السنين.

وتستمر النقاط المضيئة في تاريخنا  زي ابن سينا وابن رشد والرازي وابن المقفع وجابر بن حيان والخوارزمي وغيرهم من المبدعين في كل العلوم الطبيعية وعلم الاجتماع والفلسفة والأدب والإدارة والرياضيات وكل مجالات الحياة. وفي العصر الحديث احمد زويل وفاروق الباز وعصام حجي ونجيب محفوظ والعقاد وغيرهم من العباقرة اللي ابهروا العالم.

القاسم المشترك بين كل المبدعين دول في تاريخنا هو انهم مبتكرين ومبدعين .. دائما كانوا بيحاولو يضيفوا جديد للحياة في كل المجالات ونظروا الى الماضي نظرة مختلفة. نظرة المبتكر اللي بيدرس الماضي عشان يطوره ويصنع الحاضر والمستقبل.

لازم نغير نظرتنا لتاريخنا العظيم، نظرة الاسى والحسرة والمصمصة والبكاء على الاطلال. لازم نبطل كلمة الله يرحم ايام زمان والحنين الى الماضي اللي بيخلينا دايما متخيلين ان الماضي هو الأفضل. لازم ندرس تاريخنا كويس ونستفيد منه بأننا نجعله اساس نبني عليه الحاضر ونطور بيه المستقبل. لازم نبص لتاريخنا بغيرة تخلينا نبدع ونبتكر زي اجدادنا المبدعين اللي دول اوروبا وامريكا استغلوا ما وصلوا اليه من علوم وطوروها وصنعوا النهضة العظيمة اللي هما فيها دلوقتي في وقت كنا احنا مكتفين بالبكاء على الزمن الجميل اللي راح ومش راجع تاني.

لازم نغير عقيدة ان العصر الذهبي انتهى ونستبدلها بعقيدة ان العصر  الذهبي قادم واننا هنكمل النهضة اللي عملها اجدادنا وهنكون فخر ليهم .. لو معملناش كدا عمرنا ما هنشوف تقدم وهيفضل العالم كله يتقدم واحنا محلك سر.


أحمد عويضه

Monday, November 5, 2012

فيلكس والحاج هاجيتش



خبطتين في الراس توجع..
الاولى كانت من المغامر النمساوي فيلكس بومجارتنر  صاحب القفزة المعجزة من على حافة الغلاف الجوي للأرض على ارتفاع 39 كيلومتر.
فيلكس حلم انه يكسر الارقام القياسية ويسجل اسمه في التاريخ بالقفزة دي واستمر هو والفريق بتاعه 5 سنين يعدو العدة ويحسبوا حساباتهم بمنتهى الدقة لنجاح القفزة  المعجزة الاولى في تاريخ البشرية، والمغامر القوي الجرئ فيلكس تمكن فعلا من تنفيذ القفزة واستطاع انه يكسر حاجز الصوت في السقوط الحر في طبقة الاستروسفير لكنه للاسف لم يتمكن من كسر الرقم القياسي الخاص بالسقوط الحر لأكثر من 4 دقايق، ونتيجة للحسابات المتناهية الدقة هبط المغامر النمساوي في صحراء نيوميكسيكو بسلام بعد ان ابهر العالم.

بعد فترة قصيرة اكتشفنا مغامرة تانية قام بها المغامر البوسني "الحاج" بانوفيتشي هاجيتش، هو كمان كان عنده حلم ف انه  يحج الى بيت الله الحرام سيرا على الاقدام وفعلا اعد العدة لرحلته وفضل ماشي على رجليه مسافة 5500 كيلومتر عبر من خلالها البوسنة والهرسك وصربيا وبلغاريا وتركيا وسوريا والاردن والسعودية، واعتقل مرتين في سوريا مرة من الجيش الحر ومرة من جيش السفاح بشار الاسد، وبعد ما وصل حدود السعودية رفضوا دخوله بحجة انه مش معاه تصريح زيارة واضطر يرجع الاردن تاني عشان يجيب تصريح زيارة من السفارة السعودية، واخيرا وبعد المشقة والمغامرة الخطرة استطاع انه يحقق حلمه ف انه يحج بيت الله الحرام سيرا على الاقدام ويصبح لقبه "الحاج" هاجيتش.

اما المغامر العربي الهمام المقدام.. اللي لو وقف في بلكونه على ارتفاع 20 متر بطنه هتكركب ويصاب بالدوار ويمسك في سور البلكونه، واللي اقصى مسافة يقطعها سيرا على الاقدام هي شارع جامعة الدول العربية رايح جاي عشان يتفرج ع البنات ويا حبذا لو عرف يظبطله بنت، او لو غني يروح دبي عشان يتفسح ويرفه عن نفسه (على اساس انه مطحون في الشغل ونفسه يرتاح شوية).. المغامر الهمام ده وبعد الخبطتين اللي اخدهم ورا بعض عمل بطولة جديدة بقيادته حملات على الفيس بوك والمنتديات لتشويه وتحقير الانجاز اللي علمه فيلكس بومجارتنر ومحاولة دغدغة العواطف الدينية للمسلمين بتذكيرهم بالهدف السامي لرحلة هاجيتش وانه هو البطل الفعلي والمغامر الحقيقي مش فيلكس، ومهاجمة الاعلام العالمي "المضلل"  اللي نشر قصة فيلكس في كل المحطات ومتكلمش عن قصة هاجيتش، من غير ما يفتكروا ان مغامرة فيلكس كان غرضها ان العالم كله يعرفه وان كان ليه شركة راعية هي اللي بتسوق لقفزته عشان يجيب فلوس ينفذ بيها ويجيب الادوات اللي استعملها وان المظلة اللي هبط بيها فيلكس كان عليها اصلا اعلانات، اما الحاج هاجيتش مكانش عايز دعاية ولا اعلام واعتقد انه لولا انه اضطر يرجع الاردن عشان ياخد تصريح دخول للسعودية مكانش حد سمع عنه ولا عرف عنه حاجة.
 والحقيقة ان الحملات دي مش وراها الوازع الديني زي ماهو ظاهر انما وراها حقد اعمى نتيجة ان فيلكس وهاجيتش بمغامراتهم وطموحاتهم خلونا نشوف نفسنا على حقيقتها وان احنا عديمي الروح والخيال والحلم.. عرفتنا ان احنا مش مميزين ولا عندنا حلم حتى اننا نكون مميزين، واللي عنده حلم بيكون حلمه انه يلاقي مصباح علاء الدين او خاتم سليمان عشان يحققله كل احلامه من غير ما يتعب ولا يبذل قطرة عرق واحدة في سبيل حلمه.

فيلكس بومجارتنر و"الحاج"  بانوفيتشي هاجيتش مغامران عظيمان، كل واحد فيهم كان عنده حلم سعى وصبر وخطط وخاطر عشان يحققه، وهما الاتنين نجحو في تحقيقي حلمهم ومن الانصاف اعتبارهم مثال للمثابرة والاصرار على الحلم.
والمغامر العربي الفيسبوكي ياريت يبص لنفسه شوية ويشوف انه اصلا مش عايش لانه معندوش اي حلم ولو عنده حلم مش بيحاول يحققه.. يا ريت نبص لنفسنا ونحاول نصلحها ونسيب الناس في حالها ونعطي كل ذي حق حقه.

تحية تقدير لفيلكس بومجارتنر والحاج بانوفيتشي هاجيتش.

أحمد عويضه