الثلاثية المصرية (2)-

وتانينا السحر..

البنت لسه متجوزتش ليه لحد دلوقتي ؟؟ اكيد الولية جارتنا عملتلها عمل وربطته في رجل نملة والنملة موجودة في بطن سمكة في قاع المحيط الاطلسي، عشان كدا وقفت حالها ومتجوزتش.. هي كدا طول عمرها بتحقد على بنتي عشان اجمل والطف من بنتها.

ده بيكون رد الأم دايما على ان بنتها لسه متجوزتش ..

 للبنت نفسها ممكن نلاقيها في السلوكيات مثال حي لسوكه اللي في فيلم ابو علي، بتتخانق في الشارع مع دبان وشها ولسانها بينقط قطران ومش عامله احترام لأي حد.

او جايز تكون البنت زي الفل بس المشكلة في اهلها انهم كل ما ييجي عريس يتقدم لبنتهم يشوفوه انه مش قد المقام او يطلبوا منه طلبات تعجيزية، زي شبكة غالية جدا وشقة تمليك وعربية ومش بعيد كمان اشتراك في النادي، يستحيل على شاب في سنة انه يوفرها الا لو كان اهله مرتاحين ماديا جدا  وطبعا اي بيت لما يرفض كذا عريس اتقدم لبنتهم بيتعلم عليهم انهم مبيعجبهمش العجب ومحدش بيتقدم تاني.

في فيلم (البيضة والحجر) للراحل (أحمد زكي) ناقش القضية دي بأسلوب جميل جدا.. لما كانت جارته (معالي زايد) راحتله عشان يفكلها العمل اللي معمولها ومخليها متتجوزش وافق وقالها انه هيساعدها وكل اللي عمله انه نضفها شكلا وغير سلوكياتها للاحسن وخلاها بدل ما هي بتخانق دبان وشها بقت محترمة وهادية وكانت النتيجة انها اتجوزت واتفك العمل اللي مكانش سحر اصلا وكان سلوكيات زي الزفت.

واحدة تاني متجوزة من 5 سنين ولسه ربنا مرزقهاش بأطفال.. كشفت هي وجوزها عند دكتور وعملت تحاليل وطلعوا هما الاتنين سلام وزي الفل.. الام طبعا هتتجنن ازاي بنتها سليمة وجوزها سليم ولسه مخلفتش .. مفيش غير انه معمولها عمل مربوط في رجل نفس النملة اللي اتربط في رجلها العمل الأول بتاع الجواز وده السبب اللي خلى بنتها اللي زي الفل لسه متجوزتش.. ونتيجة للتفسير ده تبدأ رحلة اللف كعب داير على "المشايخ" وأضرحة الأولياء الصالحين عشان يفكوا العمل من بنتها وتخلف، ونسيت ان دي ارادة ربنا سبحانه وتعالى انه ميرزقهاش اطفال دلوقتي  لحكمة عنده سبحانه وتعالى.

الجزء التاني من السحر هو ان الواحد يكون "لابسه جن". الجن ده هو اللي بيتحكم في البني آدم ويخليه مسلوب الإرادة يعمل كل اللي هو عايزه وكأن الانسان فجأة اتحول ل(جريندايزر) مش بيتحرك غير لما يقوده (دوق فليد).

اغلب الأمراض النفسية في مجتمعنا مش معترف بيها ونفسرها دايما بإن المريض لابسه جن.. واحد ساكت خالص ومش بيتكلم، او واحد نفسيا مضطرب وبيتصرف تصرفات غريبة، او بيقول كلام مش مفهوم، او بيرفض دخول دار العبادة كدا يبقى هو لابسه جن مش مريض نفسي.. وبدل ما يشوفوا دكتور نفسي يعالجه يدوروا على "شيخ" عشان يطلع الجن منه.

في يوم في مقرأة قرآن كان فيه واحد قاعد وسطينا واحنا بنقرأ .. ساكت ومضطرب وبيبص حواليه دايما وفجأة لقيته قام من مكانه ونام على الارض وفضل يصرخ صراخ مفزع لمدة دقيقة وبعدها سكت دقيقة كمان وبعدها قام زي القرد ولما سألت اللي جنبي قالي انه كان لابسه جن عشان كدا هما جابوه الجامع عشان يخرجوا الجن بالقرآن الكريم .. الملفت ان الراجل بعد ما "اتعالج" ما شاء الله فضل قاعد وسطنا مضطرب بردو  وبيبص حواليه ومش بيقرأ معانا !!.

الشماعة دي زيها زي الحسد.. دليل على السلبية والاتكالية اللي خلت الناس عشان تريح دماغها تدور على قوى غيبية تكون هي السبب في كل المصايب اللي بتحصلها.. قوى منعرفش عنها حاجة غير اسمها .. منعرفش طريقة عملها ايه ولا ازاي نعرف ان الواحد محسود فعلا او مسحور فعلا وميهمناش اننا نعرف .. المهم اننا نريح دماغنا ولاقي حاجة نرمي عليها كل مصايبنا.

أحمد عويضه