خطاب تاريخي !!ـ

اتحفنا رئيسنا المؤيد من الله، حفيد عمر بن الخطاب، زائر الناس في الاحلام والرؤى وهو لابس ابيض في ابيض، بخطاب تاريخي زي اخواته الستين اللي قالهم قبل كدا، عن الاوضاع الاقتصادية المصرية، ومحاولة توضيح انه الاوضاع بخير وتحت السيطرة والامن مستتب، وهو كدب ومحاولات خداع معتادة لتزييف الحقائق وتنويم الشعب .

لما تروح البنك عشان تشتري دولارات وتعرف ان سعر بيع الدولار بعد ما كان يوم الخميس 6.19 جنيه ووصل النهاردة ل 6.36 جنيه لازم تفهم على طول ان فيه مصيبة حصلت في البلد وان سعر الجنية المصري تراجع قدام الدولار بنسبة لم تحدث من بداية الثورة، والناس اللي هتطلع تقول ان الجنيه تراجع قدام الدولار بسبب الثورة لازم تعرفوا ان الدولار في نوفمبر 2011 (بعد 10 شهور من الثورة ) كان سعره 5.97 جنيه ولحد يوم الخميس اللي فات كان 6.19 يعني زاد 21 قرش، وفي يومين زاد سعر الدولار 17 قرش، وده بسبب كثافة عمليات شراء العملات من المضاربين في العملات وده اللي خلى البنك المركزي دلوقتي هو اللي بيبيع دولارات للبنوك عشان يمشوا الشغل وطبعا الدولارات دي من الاحتياطي النقدي المصري اللي وصل دلوقتي للحد الادنى الحرج 15 مليار دولار، وده هدفه الاساسي هو سداد ديون مصر الخارجية وتوفير عملات لاستيراد السلع الأساسية للمستهلك المصري.

وطبعا الرئيس مجابش سيرة في خطابه لارتفاع سعر الدولار الخيالي ده ولا ارتفاع سعر الجنيه الاسترليني ووصوله لاكتر من  10.10 جنيه  وده مستوى موصلوش الجنيه الاسترليني من سنين.

تاني حاجة هي نزول مصر 5 درجات في التصنيف الائتماني العالمي ودي حاجة قال عليها الرئيس انها عادية، ولمن لا يعلم التصنيف الائتماني هو تصنيف الدول حسب قدرتها على الوفاء بالتزاماتهاو الديون اللي عليها، وطبعا مصيبة سوده لما يبقى الرئيس مش فاهم ان دي كارثة لاننا كدا وصلنا للحد الأدنى في المستوى (B)  ولو انخفض التصنيف الائتماني لمصر هننزل للمستوى (C) والمستوى ده يعني ضعيف ويعتمد على الظروف لسداد الديون اللي عليه. 

وطبعا الرئيس قال ان انخفاض التصنيف الائتماني هو بسبب عدم استقرار الوضع السياسي لمصر وانها انخفضت اكتر من مرة من بعد الثورة، وبغض النظر عن ان ده مصيبة لما يطلع من رئيس دولة  بيتنصل من مسؤوليته عن انخفاض التصنيف الائتماني ويرميها على الثورة وعدم استقرار الأوضاع السياسية بعد الثورة، الا ان كل الانخفاضات اللي حصلت من بعد الثورة موصلتش مصر للمستوى المتدني ده، وبعدين يا سيادة الرئيس لما عدم استقرار الوضع السياسي من بعد الثورة مستمر لحد لدوقتي، امال احنا انتخبناك ليه أصلا؟ 

قال الرئيس ان السياحة تحسنت تحسن ملحوظ وان عدد السائحين وصل ل 4 مليون سائح في الأربع شهور اللي فاتو والنسبة دي على حد تعبيره ضعف الأعداد اللي حققها قطاع السياحة في 6 اشهر من العام الماضي، وسبحان الله وزير السياحة صرح في صحيفة سعودية ان السياحة فقدت حاليا 25% من نسبة الإشغال، والبنك المركزي في بيانه اوضح ان الدخل السنوي للسياحة تراجع بنسبة 30%. 

وقال بردو ان قناة السويس حققت ارتفاع في عائداتها اكتر من 2 مليار دولار، وان دي اكبر نسبة سجلتها القناة في ربع عام من فترة كبيرة، مع ان تقرير مجلس الوزراء في شهر نوفمبر قال ان عائدات قناة السويس في اكتوبر 2012 انخفضت عن نفس الفترة من العام الماضي بنسبة 1.1% وان اجمالي عدد السفن المارة في القناة انخفض بمعدل 4.4%، وطبعا قناة السويس والسياحة يعتبروا المصدر الرئيسي للنقد الاجنبي في مصر.

وطبعا الرئيس في خطابه نفض لحاجات كتير منها ان الانتاج الصناعي في مصر في سبتمبر 2012 انخفض بنسبة 4.4% مقارنة بسبتمبر 2011، وان عجز الموازنة طبقا لتصريحات رسمية من وزارة المالية هيوصل في في الموازنة العامه الحالية ل 200 مليار جنيه وده اكبر رقم في تاريخ مصر الحديث.

خطاب مليان اكاذيب وتجاهل، ووضع اقتصادي كارثي كل العالم عارفه ما عدا حكومتنا الموقرة ورئيسنا المؤيد من الله، ورئيس بيطالب الناس بمواجهة التحديات القادمة وفي نفس الوقت مش بيقولهم ايه هي التحديات دي، بعد كمية الكذب والافتراءات اللي في الخطاب ده ممكن نصنفه فعلا انه تاريخي، وهيتحط في نفس المكان اللي فيه خطابات الحزب الوطني وحسني مبارك التاريخية.

أحمد عويضه