لا تدافعو عن رسول الله

لا تدافعو عن رسول الله لأنه ليس في موضع اتهام ..

بعد ظهور الفيلم المسئ للنبي صلى الله عليه وسلم واللي قام بانتاجه وتمثيله مصريين من اقباط المهجرخرجت علينا نفس الحناجر الرنانه اللي بتدافع عن رسول الله صلى الله عليه وسلم وهو مش في موقع اتهام .. الهجوم الشرس على الرسول صلى الله عليه وسلم والاكاذيب اللي بيحاولو يلفقوهاله مش بتدل غير على حقد وكره لخير خلق الله ولو كانو محايدين وبينظرو للامور بموضوعية وبحيادية بعيدا عن دينهم ايه كانو مش هيملكو غير انهم ينبهرو ويعجبو بشدة بسيدنا رسول الله صلى الله عليه وسلم زي ما عمل مايكل هارت لما بحث في حياة الرسول صلى الله عليه وسلم بموضوعية وبمعايير بشرية استثنى منها النبوة لانه مش مسلم اصلا ووصل لنتيجة ان الخالدون مائة واعظمهم محمد صلى الله عليه وسلم .

انسو كل الحاقدين واصحاب النفوس المشوهة اللي لو اتكلمنا معاهم مليون سنة قدام مفيهاش فايدة لان نفوسهم اتشوهت بالحقد والغل والكره .. الحل بجد ان احنا نكون مراية للنبي صلى الله عليه وسلم ولسنته وان احنا نخلي العالم كله يشوف عظمة الرسول صلى الله عليه وسلم من خلال تصرفاتنا واخلاقنا واسلوب حياتنا وانفتاحنا على العالم مع الاحتفاظ بهويتنا وتعايشنا مع الاخر المختلف معانا في الفكر او العقيدة او الجنسية او اللغة وتسامحنا معاه زي ما علمنا رسولنا الكريم صلى الله عليه وسلم. خلوهم يشوفو رحمته بالناس وبالحيوانات والجماد وحبه للخير وتمنيه الهداية للعالم اجمع ..

 يا فرحتي بمشايخ الجناحر الرنانة اللي فاكرة ان علو صوتك بيدل على قوتك في الحق ويلعنو منتجي الفيلم المسئ ومنفذيه ( وليهم كل الحق طبعا وكلنا بنلعنهم ونتمنى نحرقهم بجاز ) بس مش ده الحل ومش ده اللي هيخليهم يبطلو الاساءه لنبينا صلى الله عليه وسلم، صراخنا ف الفضائيات والتهديد والوعيد الفارغ (اللي احنا نفسنا مش بنصدقه فما بالك هما يصدقوه ازاي) مش هيجيب نتيجة والبكاء والحسرة والاكتفاء بالدعاء مش هيكون حل ومش هيجيب نتيجة .. لان ربنا طلب مننا اننا ندعوه ونعمل اللي علينا مش بس ندعوه .. احنا بنفتكر الدعاء وننسى نعمل اللي علينا او نتناسى نعمل اللي علينا ومستنيين ربنا سبحانه وتعالى يسلط عليهم طيرا ابابيل ترميهم بحجارة من سجيل ونخلص العالم منهم. 

يا اصحاب العقول ربنا سبحانه وتعالى حمى بيته الحرام من ابرهه الحبشي لان مكانش فيه تكليف للناس بالحفاظ على الكعبة ومكانش فيه رسول ولا نبي وقتها وربنا سبحانه وتعالى حمى بيته .. في سنة 317 هجرية لما القرامطة هاجمو مكة المكرمه وقتلو 30 الف حاج وانتزعو باب الكعبة وسرقو الحجر الاسود ونقلوه عندهم في جريرة اوال (البحرين) عشان يغيرو وجهة الناس للحج عندهم بدل مكة المكرمه وفضل الحجر الاسود مسروق 22 سنة ربنا سبحانه وتعالى مأرسلش عليهم بردو طيرا ابابيل .. لازم احنا كمان منستناش ان ربنا يرسل عليهم صاعقة من السماء او طيرا ابابيل وننشر الاسلام زي ما نشره التجار المسلمين .. باخلاقهم وامانتهم ومعاملاتهم ، نخلي العالم كله يشوف عظمة محمد صلى الله عليه وسلم لما يشوف سلوكياتنا واخلاقنا وتصرفاتنا وحياتنا وتقدمنا واقتدائنا بيه صلى الله عليه وسلم .

طبعا ده الحل بتاعنا احنا اللي احنا نعمله . بس لازم بردو يكون فيه رد فعل رسمي قوي من الدولة والحكومة .. اللي عمل الفيلم ده مصريين والمفروض انهم يتحاسبو قضائيا  على الاساءه للرسول صلى الله عليه وسلم وتتسحب منهم الجنسية المصرية . ولازم يكون فيه رد سياسي ودبلوماسي قوي يخلي اي دولة تاني تفكر كتير قبل ما تسمح بالاساءه لانبياء الله ورسله عليهم السلام ومنعديش الموضوع زي كل مرة شجب وادانة واستكنار وكلام فارغ ملوش اي معنى .   

احمد عويضه