جحيم الأنفاق

نازل الصبح من بيتك محترم ،هدومك نضيفه ومكويه ومترتبه والجزمة متلمعه وكله زي الفل .. تدخل محطة المترو خط الجيزة- شبرا تلاقي 10 شبابيك تذاكر واحد بس فيهم اللي شغال والباقي مقفول تحاول تدخل ف المظاهرة اللي قدام شباك التذاكر عشان تقطع تذكره (ده لو مكنتش ناصح وبتخلي تذاكر معاك من بالليل) وبعد ما يطلع عينك شوية تاخد التذكرة وتنزل بقى على الرصيف وتتفاجئ انك مش شايف الرصيف من الجماهير اللي موجوده مستنيه المترو اللي كالعادة عدت اكتر من ربع ساعة ولسه مجاش والناس بدأت تتأخر على شغلها وتتعصب ..

  

بعد شوية كدا يهل هلال المترو اخيرا وتبدأ الناس تتحفز للانقضاض على ابواب المترو اول ما تفتح وتكتشف ان الناس معجونة ف عربيات المترو زي علب السردين لدرجة انهم لازقين ف الابواب .. تفتح ابواب المترو ومحدش ينزل منه وكله عايز يركب وهنا بقى تبان موهبة كل واحد انه يخلق لنفسه مكان ف العربية وتلاقي نفسك واقف على رجل واحدة ف حضن اللي جنبك ف المترو وتلاقي واحد تاني ف حضنك انت وتفضل تتعجن ويطلع عينك والهدوم تتبهدل والجزمة السودا المتلمعة تبقى رمادي من كتر ما الناس داست عليها ، وطبعا مراوح المترو لو اصلا شغالة مش هيبقى ليها اي تأثير .. تفضل تنضرب ف خلاط المترو مع الناس لحد ما توصل المحطة اللي انت نازلها وتقضل تسأل الناس اللي قدامك اذا كانو نازلين المحطة اللي جاية ولا لأ وتستسمحهم عشان يوسعولك ومش بيوسعو لمجرد التناحة او لانه اصلا مفيش مكان عشان يوسعولك .. وهنا تبان موهبتك التانية ف انك تحاول تعدي من الناس اللي واقفة قدامك عشان تنزل وف نفس الوقت تتفادى اجتياح الجيوش اللي بتحاول تركب المترو وتوصل المحطة بتاعتك بسلام والحمد لله..

 اما بقى لو حظك وحش ولسه هتغير المترو ف السادات او الشهداء وتركب خط المرج حلوان بعد ما تنزل من المترو هتبان الموهبة التالتة عندك وهي انك تدخل سباق 100 متر حواجز على السلم عشان تطلع على رصيف حلوان لانك عارف ان لو فيه قطر على الرصيف واتحرك هتستنى ربع ساعة او اكتر عشان ييجي قطر تاني .. بعد ما وصلت على الرصيف بالسلامة والمترو وصل هتكتشف ان مترو الجيزة-شبرا اللي كنت راكبه كان فاضي بالنسبة لمترو المرج حلوان وتبدأ تمارس موهبتك ف انك تركب المترو اللي تقريبا مساحته بتتمدد وتستوعب كل الناس اللي بتركب دي او الناس هي اللي بتنكمش من غير سحر ولا شعوذة وتاخد مكانك الطبيعي ف حضن اللي جنبك وتبدأ تنضرب ف الخلاط تاني ضرب مبرح لحد ما توصل محطة دار السلام وتلاقي اذاعة المحطة الداخلية بتقولك ان دي هي آخر محطة للقطر (الموضوع ده اتكرر 4 مرات الاسبوع ده !!! ) وتسمع بقى الشتايم من الناس اللي اصلا اتاخرت على شغلها بسبب المترو وتنزل دار السلام وانت مش فاهم هو القطر ليه مكملش للآخر وتفضل الجيوش اللي كانت راكبه معاك ف القطر مستنية القطر اللي جاي رايح حلوان عشان تركب وتبص عليهم وتحاول تستوعب ازاي المترو هيشيل كل الناس دي وهو اصلا اكيد هييجي مليان على آخره وييجي المترو والناس تنقض على الابواب تتحشر جوا العربية وتعجن ف بعضها وتتعجن لحد ما توصل المحطة بتاعتك اخيرا بسلام الله ..

 تنزل من المترو وتبص لنفسك كدا تكتشف انك خارج من صندوق زبالة .. هدومك متبهدلة والجزمة بتصرخ من اللي حصل فيها وشعرك منعكش وحالتك بالبلا ،تحاول تظبط هدومك وتمسح الجزمة وتنقذ ما يمكن انقاذه عشان يبقى شكلك شكل بني آدم ..

ده اليوم العادي ف المترو ده غير طبعا الستات والبنات اللي بيتعجنو  ف المترو وسط الرجالة لان عربيتين بس للسيدات مش كفاية ، وغير ان المترو يقف ربع ساعة او اكتر بين محطتين والناس تموت عشان مش عارفه تتنفس وتتأخر اكتر واكتر على مواعيدها .  

طبعا بعد ما خلصو ال100 يوم اللي الرئيس وعد انه يحل فيهم ازمة المواصلات وبعد الزيارة الكريمة للسيد هشام قنديل رئيس الوزراء للمترو بقى وضع المترو اسوأ بكتير من الاول .. القطورات  بتصرخ وتقول طلعوني معاش لوجه الله والمواعيد بقت زفت بين كل قطر والتاني حوالي ربع ساعة او اكتر والاعطال كل شوية ولا شفنا حل لازمة المواصلات ولا شفنا أي نتيجة لزيارة هشام قنديل لمترو الانفاق لدرجة ان الواحد شاكك انه ركب المترو عشان بس يحقق حلم كان بيحلم بيه ف طفولته ..

المترو هو وسيلة المواصلات الاهم والاكتر حيوية ف القاهرة والجيزة وبيعتمد عليه ملايين المواطنين يوميا ومن سنين اصبح وسيلة مواصلات غير آدمية الناس بتتبهدل فيها وبيطلع روحهم فيها ودلوقتي تطورت من وسيلة غير آدمية للجحيم بعينه .. الناس فيه بتتعذب وتتبهدل وتتهان اكتر واكتر

فين الحلول يا سيادة رئيس الجمهورية وسيادة رئيس الوزراء وفين الوعود اللي وعدتوها والناس انتخبتكم على اساسها .. فين الحلول لأزمة طاحنة زي دي الناس بتتبهدل كل يوم عشان تروح شغلها وعشان تروح بيوتها وده طبعا بينعكس على ادائهم ف الشغل وعلى حياتهم كلها لان الواحد كل يوم بدل ما يصحى يقول اصبحنا واصبح الملك لله ويستبشر بيوم جميل بقى بيصحى مكشر وشايل هم الاهانات والبهدلة ف المترو عشان يوصل لشغله .. ارحمو الناس ونفذو وعودكم يرحمكم الله

أحمد عويضه