أولاد حارتنا ....ـ

بعد الجدل اللي كنت بسمعه دايما عن رواية اولاد حارتنا والآراء المتناقضه فيها وبعد ما قريتها اخيرا حبيت اقول رأيي ف الرواية بعيدا عن فكرة الحرام والحلال وادعياء الدين اللي اسهل حاجة عندهم انه يكفرو البشر بدل ما يكفرو عن سيئاتهم

مبدئيا شخصية الجبلاوي واضح تماما ان فيها اسقاط عن ربنا سبحانه وتعالى وبداية الرواية فيها اسقاط عن بداية خلق سيدنا آدم.. قرر الجبلاوي انه يخلي ابنه ادهم (سيدنا آدم) خليفته ف ادارة الوقف بتاعه (اني جاعل في الارض خليفه) ووافق كل الاخوة صاغرين ماعدا ادريس(ابليس) اللي رفض قرار ابوه واعترض عليه بحجة انه ابنه الكبير وامه حره وام ادهم جارية وانه ابيض البشره وادهم اسمر( انا خير منه خلقتني من نار وخلقته من طين ) .. وطرد ادريس من البيت الكبير والحدائق (الجنة ) وفضل يعيث ف الارض فسادا واوعز لادهم (آدم) انه يعمل عمل مخالف لاوامر ابوه بانه يعرفه ابوه كاتب ايه ف الوصية بتاعته الموجودة ف الكتاب السري ويضعف ادهم قدام تأثير اخوه ادريس ومسكنته وتأثير زوجته اميمه (حواء) ويعمل كدا وابوه يشوفه وهو بيعصي اوامره ويطرده هو كمان من البيت الكبير

ولما كلم جبل(سيدنا موسى) من فوق صخرة هند(جبل الطور) ومعرفش يشوف وشه ولما حاول يرفع بصره ويشوف وشه معرفش بردو .. ولما جيه الدور على رفاعة(سيدنا عيسى) سمع الجبلاوي سمع بس مشافهوش ف كان اقرب للوحي وبعد رفاعة لما جيه قاسم(سيدنا محمد) بعتله الخادم بتاعه قنديل(جبريل) عشان يبلغه رسالة جده الجبلاوي .. وجدير بالذكر انه الجبلاوي طلب من جبل انه ياخد نصيب الوقف لأهله وحيه بس (حي آل حمدان) ورفاعه (سيدنا عيسى) انه يكون بردو للحي اللي هو عايش فيه بس اما قاسم (سيدنا محمد) ف الجبلاوي قاله ان الوقف لكل اولاد الحارة على السواء لان كلهم اولادي ولازم تساوي بينهم ف العدل والتوزيع ولا تفرق بين ذكر وانثى

نيجي بقى لاصغر التفاصيل لقصص الانبياء اللي نجيب محفوظ حطها ف الرواية زي قتل قدري(قابيل) همام اخوه(هابيل) وقتله بردو بحجر وقتله عشان جده اصطفاه هو واختاره انه يعيش معاه وف قصة جبل مراة الناظر (امرأة فرعون) هي اللي شافت جبل وهو طفل صغير بيلعب ف حفرة مترعة بمياه الامطار وحبته وكان ربنا مرزقهاش باولاد ف قررت انها تتبانه وتربيه ف بيتها .. وف قصة رفاعة بعد ما قتلوه الناس حفرو القبر اللي المفروض انه اتدفن فيه وملقوش الجثة وقالو ان وقالو ان الجبلاوي اخد الجثة  واودعها عنده ف البيت الكبير واللي نشر رسالته بعد قتله هما اصحابه اللي نصروه (الحواريين ) .. وف قصة قاسم (سيدنا محمد) زواجه من قمر (السيدة خديجة) السيدة الغنية الاكبر منه ف السن واللي كان بيرعى اغنامها واعجبت بأمانته واخلاقه وحكمته وخلت الجارية بتاعتها هي اللي تلمح لقاسم بانه يتجوزها وكان اول من نصره وصدق ان الجبلاوي ارسل له خادمه قنديل (سيدنا جبريل) هما قمر زوجته (السيدة خديجة) وصادق صديقه (ابوبكر الصديق) وحسن ابن عمه (علي بن أبي طالب ) وموقف غيرة بدرية زوجته الصغيرة ف السن(السيدة عائشه) من زوجته الاولى المتوفيه  (السيدة خديجة) وقالتله ايه اللي فكره بعجوز ميته(ما بالك بعجوز شمطاء ابدلك الله خيرا منها) وغضب قاسم جدا للكلام ده والتصرف ده   

يمكن شخصية عرفه(المعرفه والعلم) هي الوحيدة اللي نجيب محفوظ ابدعها من الالف الى الياء ومنقلش من قصص تاني وعلى الرغم من ان قصة عرفة كانت اقلهم تماسكا في البناء الدرامي واعتقد ان نجيب محفوظ كتبها عشان يكسر حالة الاستياء اللي عشناها من نقل قصص الانبياء حرفيا مع تغيير الاسماء والاماكن وعشان يموت الجبلاوي اللي من اول الرواية وهو (بيوحي) للناس وعشان يوصل رسالة ان العلم والمعرفه هما الطريق الوحيد لتحسين اوضاع الناس وانه لازم  يكونو لخدمة الناس مش لخدمة اصحاب القوة والنفوذ (ناظر الوقف) وكانت نهاية عرفه قتله على يد ناظر الوقف لما حب انه يهرب منه .

مشكلة الرواية فقر الابداع الشديد ف اني انقل قصص الانبياء باصغر تفاصيلها واحطها ف رواية واغير اسماء الاشخاص والاماكن .. على الرغم من اسلوب السرد والتشويق واللغة اللي كانو ف منتهى الروعة لكن لا يليق باديب عالمي بحجم نجيب محفوظ ولا يليق بمؤلف الثلاثية والسمان والخريف والشحاذ انه يعمل رواية فيها الفقر الابداعي الرهيب ده الناتج عن النقل الحرفي من قصص الانبياء ومش الاقتباس لانه ماخدش فكره بس ده اخد اصغر التفاصيل ف قصص الانبياء

لكن الحاجة الوحيدة اللي ممكن تشفع لنجيب محفوظ ف الرواية دي ان كان فيها اسقاط عن انحراف ثورة يوليو عن اهدافها وانها كانت ف البداية لخدمة الشعب وبعد كدا بقت لخدمة اصحاب القوة والنفوذ (الفتوات وناظر الوقف)خصوصا انه كتب الرواية دي بعد انقطاع 5 سنين عن كتابة الروايات لانه شاف ان ثورة يوليو هتقضي على المشاكل اللي كان بيناقشها ف رواياته اللي كتبها قبل الثورة ولما انحرفت الثورة عن مسارها كتب اولاد حارتنا بعد الثورة ب 5 سنين عشان شاف انها انحرفت عن مسارها لخدمة الشعب . 

وبردو يجب التنويه ان نجيب محفوط ماخدش جايزة نوبل بسبب اولاد حارتنا بس وهي كانت رواية من ضمن الروايات اللي تم التنويه عنها ف احتفالية تكريمه وفوزه بجايزة نوبل للآداب عام 1988 (بعد حوالي 30 سنة من كتابة اولاد حارتنا ) وانه اخد جايزة نوبل لابداعه وتجديده ف التراث الادبي العربي وابتكاره لغة جديدة للكتابة اسهل على القارئ من اللغة اللي كانت موجوده وقتها

احمد عويضه