دورة حياة المواطن المصري

"لقد خلقنا الله أحرارا ولم يخلقنا تراثا أو عقارا"

تفتكر انت حر؟ قبل ما تتسرع وتقولي احنا دلوقتي بعد الثورة خلاص خلصنا من الاستبداد والديكتاتورية وبقينا احرار والكلام اللي بنسمعه 24 ساعة ف التلفزيون.. احب اقولك ان مش دي الحرية اللي انا قصدي عليها.. مش حريةانك تختار الرئيس وعضو مجلس الشعب اللي بيمثلك.

انا بتكلم ف حياتك.. هل انت حر ف التصرف ف حياتك واختيار مستقبلك وطريقة حياتك؟ قبل ما تندفع وتقولي طبعا انا حر ف حياتي وبختار كل حاجة ف حياتي وبعمل كل اللي انا عايزه، فكر معايا كدا ف بني آدم من اول ما يتولد وهو بيملى عليه الاوامر ويعمل ايه وميعملش ايه من ابوه وامه، ولو سمع الكلام يبقى مؤدب ولو مسمعش يبقى بايظ وياخد على دماغه.

يكبر شوية ويدخل المدرسة وبردو يملى عليه الاوامر من المدرسين والمرة دي مش الاوامر بس.. ده كمان دماغه بتتحشي بشوية كلام مش بيفهم منه حاجة عشان محدش بيفهمهوله وبيحفظه وخلاص ويفضل محتفظ بيه زي ترمس الشاي لحد ما ييجي الامتحان ويدلق الكلام اللي ف الترمس.. قصدي ف دماغه على كراسة الاجابة وينسى كل الكلام ده.. لما يعمل كدا يبقى شاطر وياخد درجات عالية ولو معملش كدا وتجرأ انه يفهم ويجاوب بفهمه والمختصر المفيد يبقى فاشل ويجيب درجات اقل من اللي بيحفظو بالنص ويكتبو الاجابة زي كتاب المدرسة.

الحمد لله كدا خلصنا من مرحلة التعليم المقرفة دي ودخلنا ع الجامعة واحنا متخيلين بقى الحياة الجامعية والمعامل والفهم (ده غير الحاجات اللي كنا بنتخيلها وملهاش دعوة بالدراسة خالص) والكلام الكدب اللي كنا بنشوفه ف التلفزيون.. تدخل الكلية (اللي انت بردو مدخلتهاش بمزاجك عشان مكتب التنسيق او اوامر الوالد حفظه الله) وتتصدم بالواقع يا عيني.. ان الحاجة اللي لو اتعلمتها هتبقى ممتاز هي ازاي تكتب بسرعة ورا الدكتور ف المحاضرة ولو كح ف المحاضرة تكتب انه كح.. ويفضل الدكتور يملي عليك الاوامر واكتر واحد بينفذ اوامره ويحفظ كلامه هو اللي هيبقى معيد.. والفاشل اللي بيحاول يفهم وميحفظش اهي دقني لو طلع من الكلية.

خلصت الحمد لله مراحل التعليم بكل قرفها وارتحت.. هنفترض انك لقيت شغل بسرعة ومقعدتش شوية حلوين ف البيت.. تيجي بقى ف الوظيفة ومديرك طبعا يملي عليك الاوامر وانت غصب عنك تسمع الاوامر وتنفذها حتى لو انت عارف ان مديرك ده حمار وملوش فيها.. ولو تجرأت وعصيت اوامره يبقى نهارك اسود ومهبب، لو ف القطاع الحكومي هتفضل على نفس الدرجة بتاعتك وغيرك يترقى ولو قطاع خاص يبقى هتتترفد اصلا وتقعد ف بيتكم.

شوية بقى وتتجنن وتقول عايز اكمل نص ديني (نفسي حد يقولي ايه النص التاني)وتلاقي ابوك وامك عايزين يجوزوك حد معين ويرسمولك حياتك معاه ويعتبرو رأيك تحصيل حاصل (ما انت اللي معودهم على كدا) ويخطبولك العروسه ويجوزوهالك واخبط راسك ف الحيط يا معلم لو مش عايزها..وتبدأ انت ساعتها تملي الاوامر على مراتك والبنت هي اللي تفضل يملى عليها الاوامر وتنفذها، ده لو كنت راجل اوي وملو هدومك. اما لو كنت من انصار متقفش ف وش القطر، ابشر حضرتك انك هتفضل طول عمرك يملى عليك الاوامر من ابوك وامك ومراتك ومديرك لحد ما ربنا يرزقك بحتة عيل وتمارس اخيرا سلطتك المفقودة اللي انت نفسك تمارسها وهي انك تملي الاوامر على حد.

حتى ف الدين وده الاخطر.. ربنا سبحانه وتعالى امرنا بالتفكير والتأمل وننا نفكر ف ديننا ونآمن بمعرفه واقتناع مش باتباع وخلاص.. بس طبعا المشايخ الموجودين خلو البني آدم متبع زي الاغنام ومش بيفكر.. لو فكر ف حاجة في الدين واتناقش فيها يتهموه بالفسق والكفر زي ما اتهمو الدكتور مصطفى محمود بالكفر بعد ما ناقش شفاعة النبي صلى الله عليه وسلم في كتاب الشفاعة، وزي ما اللي قبلهم اتهمو الامام محمد عبده بالفسق لما قال ان الانسان مخير مش مسير. دلوقتي لو فكرت ف الدين وتدبرت وسألت عشان تفهم يتهموك بالفسق والفجوز وبقت دلوقتي اكبر اهتمامتنا ف الدين النقاب واللحية فرض ولا سنة، حصرنا الدين فيهم ونسينا ان الدين اكبر واعمق بكتير وكانت النتيجة اننا بقينا بننفذ تعاليم ديننا كلها ما عدا اهم واحدة وهي انك تفكر وتفهم مع ان ده هو الحاجة الوحيدة اللي هتخلي الواحد بني آدم.

وصلنا دلوقتي لمرحلة الخوف.. خايف انك تفكر وتاخد قرار ف حياتك وتتحمل مسئوليته.. ومع استمرار خوفك بقيت دلوقتي عايز اللي يفكرلك ويقولك تعمل ايه ف كل حاجة وكدا حضراتكم فقدتو ميزة البني آدم عن باقي الكائنات وهي التفكير والعقل.

هي دي دورة حياة المواطن المصري.. تفتكر دلوقتي انك حر.. طب تفتكر ان دي عيشة بني آدم اصلا.. ربنا سبحانه وتعالى وهبنا نعمة العقل عشان نفكر ووهبنا الحرية عشان نستخدمها ف حياتنا وقراراتنا عشان هنتحاسب عليها يوم القيامة.

للأسف احنا اتربينا غلط زي ما اهالينا اتربو غلط.. يا اهالينا افهمو بر الوالدين صح وافهمو بردو بر الابناء.. افهمو ان ربنا خلقنا احرار واحنا اللي نقرر حياتنا ومحدش يقررهالنا.. علمو ولادكم ازاي يفكرو ويقررو حياتهم عشان يتحملو مسئولية نفسهم وعشان ميعيشوش كالانعام بل هم اضل سبيلا.. علموهم يفكرو عشان نلاقي مبدعين ف كل مجال وعشان تبقى حياتنا احسن.. انتو البداية ولو انتو علمتو ولادكم يفكرو وميسمعوش الاوامر وينفذوها وخلاص يبقى ده اول طريق الحل.

أحمد عويضه